រក្សានិងច្នៃផលិតអាហារអោយកាន់តែ មានប្រយោជន៍? អ្នកអាចធ្វើវាបាន

Share

វាតែងជារឿងល្អ ដែលអ្នកទទួលបានភោគផលកសិកម្ម ឬ នេសាទ។ ពេលខ្លៈ អ្នកអាចប្រើប្រាស់ ឬលក់វាភ្លាមៗ តែមាន ពេលខ្លៈទៀត អ្នកចង់រក្សាវាទុក អោយបានយូរ ឬច្នៃវា ដើម្បីបង្កើន តំលៃបន្ថែម ជាប្រយោជន៍លើកកំពស់ ប្រាក់ចំណូល។ អត្ថបទ នេះនឹងបង្ហាញជូនត្រួសៗ អំពីវិធីរក្សាឬច្នៃអាហារ ដែលបច្ចេក ទេសខ្លៈត្រូវបានអនុវត្តតាំងពីយូរលង់មកហើយ គ្រាន់តែមាន បែបបទ ប្លែកគ្នាបន្តិចបន្តួច តាមតំបន់ និងតាមសហគមន៍។

 

បច្ចេកទេសថ្មីៗជាច្រើន ត្រូវបានអ្នកវិទ្យាសាស្រ្តអភិវឌ្ឍន៍ដោយផ្តើមចេញពី គោលការណ៍ ដែលបានអនុវត្ត តាំងពីបុរាណនោះ។ ពត៌មាន និងទិន្នន័យជាច្រើន កាន់តែត្រូវប្រមូលបាន និងផ្សព្វផ្សាយទាក់ទងនឹង ផលិតផលអាហារ ប្រូសេសនៃការផលិត គុណភាព និងគុណប្រយោជន៍របស់វា។

 

ជាដំបូង យើងស្វែងយល់ពីមូលហេតុចំបងៗ ដែលនាំអោយអាហារចុះគុណភាព និងខូច។ ដោយឆ្លងតាម ធម្មជាតិ ឬដោយការធ្វេសប្រហែស ផលិតផលកសិកម្មឬនេសាទមានផ្ទុកនូវ៖

  • ពពួកអតិសុខុមប្រាណដូចជា បាក់តេរី ផ្សិត ។ល។ ដែលមាន ទំហំតូចមិនអាចមើលដោយ ភ្នែកទទេបាន
  • ពពួកអង់ស៊ីម ដែលជា ប្រូតេអ៊ីនពិសេសមួយបែប ដែលជំរុញ អោយមាន ប្រតិកម្មគីមី របស់សារជាតិផ្សំ ក្នុងផលិតផលអាហារ នៅសីតុណ្ហភាព ចាប់ពី ០ ដល់ ៦០ អង្សាសេ។
  • សត្វល្អិត
  • ជាតិគ្រោះថ្នាក់ដែលមានដោយធម្មជាតិ ឬដោយការឆ្លង ឬដោយការប្រើប្រាស់ មិនត្រឹមត្រូវ តាមក្បួនខ្នាត

 

ដោយមានលក្ខខ័ណ្ឌមិនសមស្រប បង្កដោយខ្យល់ ពន្លឺ កំដៅ សំណើម ឬការប៉ៈទង្គិចរូបរាងផងនោះ ម្ហូបអាហារ ងាយត្រូវបានបំផ្លាញ ដែល ពេលខ្លៈ មិនត្រឹមតែខូច សោភ័ណភាពខាងក្រៅ ដូចជាប្តូរពណ៌ ក្លិន ឬមានកករ ប៉ុណ្ណោះទេ តែថែមទាំងអាច ឈានដល់ កំរិតគ្រោះថ្នាក់ ដល់សុខភាព និងអាយុជីវិតបាន។ ដូច្នេះ ការរក្សាទុកដាក់ ឬកែច្នៃ ផលិតផល អាហារ ត្រូវធ្វើដោយប្រុងប្រយ័ត្ន និង គោរពតាម ក្បួនខ្នាត បច្ចេកទេស និងអនាម័យ ត្រឹមត្រូវ។ គោលការណ៍បច្ចេកទេស រក្សាឬកែច្នៃ គឺព្យាយាមបំបាត់ ឬកាត់បន្ថយ ឥទ្ធិពល នៃកត្តាបង្កបញ្ហាដែលបានរៀបរាប់ខាងលើ។ ជាទូទៅ ផលិតផលអាហារដែលល្អ មិនមែនមានន័យថា ផលិតផលនោះ មិនមាន អតិសុខុមប្រាណ ឬធាតុបង្ក បញ្ហា ទាំងនេះ ទាល់តែសោះនោះឡើយ គឺគ្រាន់តែអាច ធ្វើពួកវាខ្លៈ មាន កំរិតមួយ ឬស្ថានភាពមួយ ដែលមិនបង្កបញ្ហាដល់ផលិតផល និងសុខភាពអ្នកបរិភោគ។

 

ខាងក្រោមជាវិធីចំបងៗសំរាប់រក្សាទុកឬកែច្នៃអាហារ៖

 

  • ការរក្សាទុកនៅសីតុណ្ហភាពត្រជាក់ឬបង្កកៈ ភាពត្រជាក់មិនអាចសំលាប់មេរោគ ឬអង់ស៊ីមទេ តែអាច ទប់ ស្កាត់ សកម្មភាព ឬការដុះដាលនៃពពួកនេះ។ កំរិត នៃ សីតុណ្ហភាព មានខុសៗគ្នា ទៅតាមប្រភេទ និងធម្មជាតិ នៃផលិតផល។
  • ការកាត់បន្ថយបរិមាណទឹក ឬសកម្មភាពទឹក តាមរយៈ ការធ្វើសំងួត ឆ្អើរ ប្រឡាក់អំបិលឬស្ករ
  • ការធ្វើកំដៅ តាមរយៈស្រុះបង្គាំងអង់ស៊ីម ចំអិន Pasteurization ឬការធ្វើស្ទេរីល(sterilization)
  • ការបង្កើនកំរិតជូរ ដោយត្រាំទឹកខ្មេះ ដោយកាច់មេ (lactic or acetic fermentation) ឬដោយថែមធាតុជូរអាហារ
  • ការដកខ្យល់ (vacuum packaging) ឬបន្ថយអុកស៊ីសែន នៃ បរិយាកាស ក្នុងសំបក វេចខ្ចប់ (atmosphere modification)
  • ការកាច់មេ ឬបិតដំឡើងកំរិតជាតិស្រវឹង (alcoholic fermentation or distillation) ត្បិតជាតិស្រវឹង ជាអាល់កុល ដែល អាច ធ្វើអោយ អតិសុខុមប្រាណអន្តរាយ
  • ការសំលាប់អតិសុខុមប្រាណដោយកាំរស្មី (Irradiation)
  • ការប្រើធាតុបន្ថែម (additives) ដូចជាធាតុរក្សា (preservatives) ឬធាតុប្រឆាំងអុកស៊ីតកម្ម (anti-oxidants) ជាដើម ។ល។ ធាតុ ទាំងនេះ ត្រូវបាន អ្នកវិទ្យាសាស្រ្ត និងអ្នកច្បាប់ ជាតិនិងអន្តរជាតិ កំណត់ថា ធាតុណា ត្រូវបាន អនុញ្ញាតអោយប្រើ ឬមិនអោយប្រើ ព្រមទាំង កំរិតបរិមាណដែលត្រូវប្រើសមស្រប បន្ទាប់ពីឆ្លងកាត់ ការធ្វើពិសោធន៍ សុវត្ថិភាព ដែលអាចជឿទុកចិត្ត និងទទួលស្គាល់ ក្នុងមជ្ឈដ្ឋាន វិទ្យាសាស្រ្ត សកល។ ការប្រើប្រាស់ធាតុបន្ថែម ដែល មិនបាន ការអនុញ្ញាត ឬដោយមិនគោរព តាមក្បួនខ្នាត កំណត់ ត្រូវ បាន ចាត់ជា ខុសច្បាប់បច្ចេកទេស និងអាចបង្ក ជាបញ្ហា ដល់ សុខភាព របស់អ្នកបរិភោគ។
  • ការជ្រើសរើសដប ឬសំបកវេចខ្ចប់ ដែលអាចទប់ស្កាត់ កាំរស្មីឬពន្លឺ

 

ទោះជាអ្នកជ្រើសរើសវិធីណាមកប្រើក៏ដោយ អ្នកត្រូវកំណត់ថា សុវត្ថិភាព ផលិតផលអាហារ របស់អ្នក ជាតំរូវការ ចំបងបំផុត របស់ អ្នកប្រើប្រាស់ ជាងភាពរីករាយ ជាមួយក្លិន ឬរសជាតិ ឈ្ងុយឆ្ងាញ់ របស់ វា។ មិនមានអ្នកណាចង់ទទួលទានហើយ ទទួលបានជំងឺរាគរូស ឬមាន ផលវិបាកដល់សុខភាព ប៉ុន្តែពេលខ្លៈ អ្នកមិនអាចដឹងថា មានការ លូតលាស់ នៃមេរោគ ឬការឆ្លងគ្រោះថ្នាក់ក្នុងអាហារ ដោយការសង្កេត សភាពខាងក្រៅ នៃអាហារ ឡើយ។ ដូច្នេះ អ្នកត្រូវអនុវត្ត វិធីសាស្រ្ត ទាំងនេះ ដោយគោរពតាម ក្បួនខ្នាតបច្ចេកទេស ច្បាស់លាស់។ យើងខ្ញុំ នឹង បង្ហាញជូន លំអិតពីវិធីរក្សា និងកែច្នៃនិមួយៗ នៅក្នុង អត្ថបទ ក្រោយ ទៀត។

 

ដោយ៖  អុល តុលា ( This email address is being protected from spambots. You need JavaScript enabled to view it. )

Share

Additional information